अभिनेत्रीको चरित्रहत्या प्रकरणको बिरुद्धमा कलाकार संघद्वारा प्रहरीमा मुद्दा दर्ता

काठमाण्डौँ, ज्येष्ठ १३ तेजनेपाल
नेपाली सिने जगतकी केही नेपाली अभिनेत्रीहरुको चरित्र हत्या गर्ने मनशायले नक्कली पोर्न भिडियो बनाउँदै सार्वजनिक गर्ने क्रम बढेको भन्दै नेपाल चलचित्र कलाकार संघले कारबाहीको लागि प्रहरीमा उजुरी दिएको छ । संघका अध्यक्ष रविन्द्र खड्कासहितको टोलीले महानगरिय अपराध महाशाखा, टेकुमा पुगेर उजुरी दर्ता गराएको हो ।

आईतबार तथा सोमबार दुई जना अभिनेत्रीहरुका नक्कली पोर्न भिडियो बनाएर सार्वजनिक गरिएको तथा अन्य अभिनेत्रीहरूको समेत त्यस्तै नक्कली भिडियो सार्वजनिक गर्ने धम्की समेत दिइएको तथा यस्ता घटनाले समाजमा राम्रो छवि भएका नेपाली अभिनेत्रीहरू मानसिक रूपले विक्षिप्त भएको कुरा पनि संघली जानकारी गराएको छ ।

संघका अध्यक्ष खड्काले वुझाएको उजुरी पत्रमा भनिएको छ–‘विगत केही दिनदेखि प्रविधिको चरम दुरुपयोग गर्दै नेपाली चलचित्रसँग सम्बन्धित कलाकारहरुको नक्कली अश्लिल भिडियो बनाएर विभिन्न माध्यमबाट सार्वजनिक गर्ने क्रम बढेको छ । कलाकारहरुको बारेमा भ्रम श्रृजना गरी चरित्र हत्या गर्ने दुस्प्रयास भएकाले यथाशिघ्र यसको छानविन गरी दोषीलाई कडा कारवाहीको माग गर्दछौ ।’ प्रहरीले यस बिषयमा तत्काल छानविन गर्ने बताएको संघका खड्काले जानकारी दिएका छन् ।

त्यस्तै कलाकार संघका उपाध्यक्ष तथा प्रवक्ता मोहन निरौलाले एउटा प्रेस वक्तव्य जारी गर्दै प्रविधिको माध्यमबाट कलाकारहरूको मानमर्दन हुने गरि अतिरन्जित सामाग्रिहरू सामाजिक संन्जालमा देखिन आएकाले नेपाल चलचित्र कलाकार संघको ध्यान आकृष्ट भएको तथा यस्ता दुष्प्रचार प्रति भ्रममा नपर्न संघको तर्फ सबैसंग अनुरोध पनि गरेका छन । साथै यस्तो असामाजिक एवं निन्दनीय अपराधिक कार्यको घोर निन्दा गर्दै यस्ता कार्य गर्नेलाई कानुनी कारबाही मात्र नभई सामाजिक बहिष्कार गर्न पनि पछी नहटने जानकारी गराउनु भएको थियो । संघ सदैब चलचित्र क्षेत्रको सबै बिधाका पेशाकर्मी र कलाकारहरूको साथमा रहेको तथा सम्बन्धित निकायले यस प्रकारको असामाजिक कार्यको पटाक्षेप गर्दै दोषीलाई कड़ा भन्दा कड़ा कारबाही गर्ने कुरामा संघ पूर्ण विश्वस्त रहेको जानकारी पनि गराउनु भयो ।

सभार:https://www.faan.org.np

Leave a Reply

Your email address will not be published. Required fields are marked *